| திருநாவுக்கரசு சுவாமிகள் தேவாரம் |
| நான்காம் திருமுறை |
4.9 திருஅங்கமாலை
பண் - சாதாரி |
தலையே நீவணங்காய் - தலை
மாலை தலைக்கணிந்து
தலையா லேபலி தேருந் தலைவனைத்
தலையே நீவணங்காய்.
|
1 |
கண்காள் காண்மின்களோ - கடல்
நஞ்சுண்ட கண்டன்தன்னை
எண்டோள் வீசிநின் றாடும் பிரான்றன்னைக்
கண்காள் காண்மின்களோ.
|
2 |
செவிகாள் கேண்மின்களோ - சிவன்
எம்மிறை செம்பவள
எரிபோல் மேனிப்பி ரான்றிறம் எப்போதுஞ்
செவிகாள் கேண்மின்களோ.
|
3 |
மூக்கே நீமுரலாய் - முது
காடுறை முக்கணனை
வாக்கே நோக்கிய மங்கைமணாளனை
மூக்கே நீமுரலாய்.
|
4 |
வாயே வாழ்த்துகண்டாய் - மத
யானை யுரிபோர்த்துப்
பேய்வாழ் காட்டகத் தாடும் பிரான்தன்னை
வாயே வாழ்த்துகண்டாய்.
|
5 |
நெங்சே நீநினையாய் - நிமிர்
புன்சடை நின்மலனை
மஞ்சா டும்மலை மங்கை மணாளனை
நெங்சே நீநினையாய்.
|
6 |
கைகாள் கூப்பித்தொழீர் - கடி
மாமலர் தூவிநின்று
பைவாய்ப் பாம்பரை யார்த்த பரமனை
கைகாள் கூப்பித்தொழீர்.
|
7 |
ஆக்கை யாற்பயனென் - அரன்
கோயில் வலம்வந்து
பூக்கை யாலட்டிப் போற்றி யென்னாதவிவ்
வாக்கை யாற்பயனென்.
|
8 |
கால்க ளாற்பயனென் - கறைக்
கண்டண் உறைகோயில்
கோலக் கோபுரக் கோகர ணஞ்சூழாக்
கால்க ளாற்பயனென்.
|
9 |
உற்றா ராருளரோ - உயிர்
கொண்டு போம்பொழுது
குற்றா லத்துறை கூத்தனல்லால் நமக்
குற்றார் ஆருளரோ.
|
10 |
இருமாந்து இருப்பன்கொலோ - ஈசன்
பலகணத்து எண்ணப்பட்டுச்
சிறுமான்ஏந்திதன் சேவடிக்கீழ்ச் சென்று அங்கு
இறுமாந்து இருப்பன்கொலோ.
|
11 |
தேடிக் கண்டுகொண்டேன் - திரு
மாலொடு நான்முகனும்
தேடிக் தேடொணாத் தேவனை என்னுளே
தேடிக் கண்டுகொண்டேன்.
|
12 |
| திருச்சிற்றம்பலம் |
